الطريقة الصحيحة لمراجعة و حفظ الدروس

طريقة المذاكرة
هذا الموضوع يختلف كثير عن باقي
المواضيع اللي تطرح غالبا عن طريقة المذاكرة
فهو شامل على كل المشاكلََ
اللي تواجه الطالب أثناء الدراسة وشامل على جميع الحلول
وباللهجة
العامية عشان يكون فيه تقبل أكثر وصحيح أنه يذكر المواد المدرسية بدون
الجامعية لكن طالب الجامعة ممكن يبدل فقط أسامي المواد إلى مواد تخصصه
ويمشي على نفس النظام
ومن أهم مزايا الموضوع انه يحل المشاكل المتعلقة
بالدراسة واللي هي:
النوم والأكل ووقت المذاكرة وتنظيم وقت المذاكرة
والمشاكل النفسية وطريقة المذاكرة والمراجعة والزملاء ومذاكرة الاختبارات
والاختبارات
جميع هاذي مشاكل عند جميع الطلاب تقريبا وفي هالموضوع
حلولها كامل
نصيحتي اقرأ الموضوع ونفذه بحذافيره وبإذن الله تشوف نسبتك
من أفضل ما يكون
لكن أتمنى فعلا من أي شخص يقرأ هالموضوع انه ينشره في
جميع المنتديات المشترك فيها والمنتديات التعليمية وبشرط انه يكون بنفس
العنوان ليسهل البحث عنه
( الموسوعة الكاملة للمذاكرة وحل مشاكلها ..
للحصول على نسبة في مراتب الشرف )
ومعه أكثر من رابط لملف على هيئة ملف
نصي (word) بتنسيق مرتب ولإمكانية وضعه في دسك أو طباعته
نبدأ الموضوع
السلام
عليكم
كثير من الناس يذاكر ويذاكر ويذاكر وفي الأخير يتفا جئ من
النتيجة أنها مو بمستوى مذاكرته
يسأل : ليش ؟؟ أنا كنت أذاكر 4 و 5
ساعات في اليوم !!! وفي الأخير هذه هي النتيجة !! مو بنفس مستوى مذاكرتي
!!!
إذا كنا تذاكر من 4 ساعات إلى 5 ساعات يوميا فأحنى تقضي 7680 ساعة
من حياتنا المدرسيه غير الجامعية في الدراسة
طيب أنت ما شاء الله عليك
ذاكرت هالكم من الساعات 7680 ساعة ولا قعدت ساعة وحده أو ساعتين بالكثير
تتعلم كيف تذاكر
سمعت الدكتور الرائع رشاد فقيه يقول
( احنى نقضي
آلاف الساعات في المذاكرة وما نقضي ساعة وحده نتعلم كيف نذاكر )
وفي هذا
الموضوع راح أتكلم عن المخ كأنه جهاز كمبيوتر وهو فعلا مشابه جدا لجهاز
الكمبيوتر
فيه مشاكل في طريقة مذاكرتنا
ما عندنا إلا نفتح أدمغتنا
وندخل فيها المعلومات بشكل مبعثر أو الدماغ غير متأهب لإدخال المعلومات
وفي
الأخير يعمل الدماغ لهاذي المعلومات format والسبب تهنيق وبطئ في تبادل
المعلومات
ويبدأ الحين في طرح المشاكل وحلها وحده وحده
أولا: النوم
أكبر
سبب في تدني مستوى المذاكرة والتذكر هي النوم متأخر
ننام الساعة 12
الليل ونصحى 6 الصباح بكل معاناة بس كلها ساعة وخلاص نصير مصحصين
طيب
والمخ هل فكرنا فيه ؟؟ المخ يبقى في حاله من عدم الإستجابه مده طويلة
وفيه
هاذي الحالة من عدم الإستجابه يصعب استيعاب الدرس واستقبال المعلومات
ويصعب مذاكرتها وتذكرها
المخ يحتاج إلى 8 ساعات نوم على الأقل لأخذ
كفايته من الراحة وخصوصا نوم الليل
لأن تخزين المعلومات من المذاكرة
تحتاج لراحة لحفظها وتحتاج لراحة لاستقبال الجديد من المعلومات
وجرب
النوم بدري وشوف النتيجة بعد أسبوع
والكثير من الناس يفضل القيلولة أو
مثل ما نسميها ( نومة العصر ) وهي من ساعتين وتوصل إلى أربع ساعات في فترة
النهار
وهاذي لها مشاكلها ومنها ضياع للوقت يعني تتغدى بثقل وبعدها تنام
بثقل وفي الأخير راح تصحى بثقل وخمول وكسل
جرب المذاكرة وقت العصر فعلا
هو أفضل وقت للمذاكرة
ثانيا : الأكل
لازم نختار وقت الأكل بحيث أنه
ما يخرب علينا المذاكرة ... كيف ؟؟
ما يصلح نذاكر على جوع فالمخ في هاذي
الحالة يكون ضعيف الإستجابه بسبب قلة الطاقة الموجودة في الجسم
يعني لا
يفضل الرجيم وقت الدراسة
ثاني شي ما تصلح المذاكرة بعد أكل وجبه دسمه
والتخمة لأن الدم يكون متجمع في الأمعاء
لأخذ الغذاء والدم اللي يصل
للمخ قليل ويؤدي هالشي إلى الخمول وعدم القدرة على المذاكرة
أفضل شي هو
أكل وجبه خفيفة قبل المذاكرة بساعة أو وجبة دسمه قبل المذاكرة بساعتين
ثالثا:
الوقت
لازم أولا اختيار الوقت الصحيح للمذاكرة
أبعد عن هاذي الأوقات
آخر
الليل أو قبل النوم لأن هالفترة يكون المخ فيها غير قابل لاستيعاب
المعلومات بسبب أن الذاكرة ممتلئة
وقت شد الأعصاب يعني توك متهاوش مع
أحد أو حصل لك موقف عصبك لأن طول هالوقت راح يكون تفكيرك في الموقف ولا راح
تركز عالمعلومات اللي تذاكرها أبداً
وقت إذا كان عندك شي وودك تسويه
مثلا أنك ودك تجلس على الإنترنت لمدة نص ساعة... قدم الإنترنت على المذاكرة
لأن طول وأنت مذاكر بتحاول انك تخلص بسرعة حتى لو ما فهمت بس عشان تجلس
على الإنترنت
لكن لازم تتقيد بالوقت وتجلس نص ساعة أو حتى أقل ولا تعطي
نفسك راحتها
تجنب وقت المذاكرة بعد مجهود عضلي لأن جسمك راح يكون تعبان
ألتزم
بهالأوقات
وقت الهدوء .. اختار وقت يكون في الوضع في البيت هادئ وابدأ
ذاكر أو انك تكون مستقل في غرفة خاصة بعيد عن الإزعاج
اختار وقت صفاء
الذهن يعني ما تكون مشغول بشي أو مهموم أو معصب أو مالك خلق فصدقني
بهالطريقة ما بتستعوب المعلومة
رابعا: تنظيم الوقت
يجهل الكثير تنظيم
الوقت فتلاقي وقته فوضى ما بين المذاكرة والراحة واللعب والطلعة و.. و ..
الخ
صعب أني أقولك اكتب جدول وامشي عليه لأن مو كثيرين يقدرون يمشون على
الجداول ( وأنا منهم ) لكن إذا شفت في نفسك أنك تقدر تمشي على جدول فسوي
لك جدول
أما إذا كنت ما تقدر تسوي جدول وتمشي عليه مثل حالتي فاتبع اللي
إنا كنت اسويه
كنت دائما أقر في نفسي أن إنا في مرحلة حسم يعني يا غالب
يا مغلوب ولازم انظم نفسي
وبالنسبة لتنظيم الوقت حاول أنك تضبط وقتك
بحيث اليوم يكون فيه ثلاث ارباعه للمذاكرة وربعه الباقي للراحة واللعب
وغيره
ومن الأفضل انك تختار وقت معين يكون هو وقت المذاكرة مثل اللي
اسويه اختار من 4 العصر إلى 7 الليل ويكون هذا هو وقتي الخاص بالمذاكرة
أما
بالنسبة للخميس والجمعة فاعتبرها كأنها الإجازة الصيفيه وخذ راحتك وأنسى
شي اسمه الدروس والمذاكرة (إلا إذا كان عندك اختبار)
لأنك لازم توفق بين
الراحة والمذاكرة وإلا بعدها راح تصاب بحالة من الملل والتعب والكره للكتب
خامسا
: المشاكل النفسية في أوقات المذاكرة والثقة بالنفس
تصيبنا كثير مشاكل
نفسيه وقت المذاكرة ومنها الملل والإحساس بالفشل وعدم الثقة بالنفس
لكن
فيه طرق نقدر نتجنب فيها هالمشاكل
الملل
كثير من اللي توهم بدئوا
يذاكرون بجد واجتهاد حسو بملل والسبب هو إن هذا شي جديد عليهم وما تعودو
عليه ومن يومهم وهم ما يحبون الدراسة ويكرهون المذاكرة والحين فجأة صارو
ملزومين بالمذاكرة
أفضل طريقة لتجنب هالمشكلة هي انك تبدأ مذاكرتك شوي
شوي إذا كنت جديد على المذاكرة
يعني ابدأ من اليوم الأول مثلا بمذاكرة
مادة الرياضيات والكيمياء واليوم الثاني للفيزياء والإنجليزي واليوم الثالث
للأحياء ومواد العربي
لمدة أسبوع والأسبوع الثاني خليها ثلاث مواد
والأسبوع الثالث خليها 4 مواد والأسبوع الرابع تصير 5 مواد
وهنا تصير في
وضع ممتاز ولكن أهم شي مذاكرة المواد العلمية كل درس بدرسه
واعتبر نفسك
في حالة حرب وحط في بالك هالاشياء زين زين :
( إذا ما شديت حيلي وجبت
معدل عالي مستقبلي بيضيع )
(راح اندم على كل ساعة فوتها بدون ما استغلها
في المذاكرة )
الإحساس بالفشل
فيه كثيرين فشلو بالاختبارات البسيطة
وفقدو الأمل في النجاح وحسو بالفشل بسبب اختبار
ومنهم أنا ...مره من
المرات بسبب احد اختبارات الكيمياء الشهرية ( اختبارات تقييميه) أخذت فيه
5/10 وحسيت إني فقدت الأمل في كل شي حتى في باقي المواد
مع أن الكيمياء
كانت سهله بنظري ولكن استغربت لما أخذت هالدرجه
لكن بما أننا كنا في
ثاني ثانوي وكانت الاختبارات التقييمية وكانت نسبتنا تراكمية مع ثالث ثانوي
كانو المدرسين بعادتهم يختبرونا ثلاث اختبارات للمواد العلمية
ومن
كلامهم أنهم بياخذون أعلى درجتين ويقسمونها على 2
أنا هنا تحمست وقل
لازم ادفن الدرجة الأولى وفعلا أخذت في الاختبار الأول 10 والثاني 9 وانقسم
على 2و أنجبر النص
وأخذت في الفصل الأول في الكيمياء 49 والفصل الثاني
50 وطلعت نتيجتي في الكيمياء 99/100 وأعلى درجة في الشهادة بعد ما قلت أن
الكيمياء اللي بتهدم مستقبلي جبت فيها أعلى درجة في شهادتي
عدم الثقة في
النفس
كثيرين ما يثقون في أنفسهم وفي قدراتهم ويشوف اللي نسميهم
الدوافير ياخذون 99% و 100% ويقول في نفسه مستحيل أوصلهم أو حتى اقرب منهم
وهذا
هو البلى .. هنا تنعدم الثقة بالنفس وبالتالي يقل الحماس إلى الصفر
أنا
كان طموحي أن نسبتي توصل 90% ( مع أني كان ودي بحول 85% بس ) وكنت أقول
هنا أنا راح أكون مرتاح وهذا كل اللي ابغاه وكان طموحي إني ادخل أي كلية
وكنت
قبل ما استلم الشهادة أتخيل مجرد تخيل أني نسبتي 95% وكنت اضحك وأقول يا
زين هالتخيل والله أحلامي فوووووق
فتفاجأت بتقريري الفصلي وهو يعطيني
نسبتي أن نسبتي 93%
فاستغربت من نفسي كيف قدرت أجيب هالنسبه بكل سهوله
فقلت
لازم اشد حيلي وأحاول الفصل الثاني أوصل النسبة 94% ( يعني أجيب الفصل
الثاني 95% )
شيدت حيلي بشكل مو طبيعي وتفاجأت من النسبة !!!!
طلعت
نسبتي 94.94% وبرقم مميز بعد يعني جيت الفصل الثاني 97%
أنا أجيب 97%
!!!! أني اللي كنت أقول لا يمكن أتعدى الـ 90% الحين أجيب 97% !!!!
فعلا
الواحد منا إذا صار فاقد الثقة في نفسه تصعب عليه أشياء كثيرة
وإذا
تسلح بالثقة بالنفس يقدر يسوي أشياء كثيرة.. بس لا تكون واثق لدرجة الغرور
بنفسك
فصدقني راح تقدر تجاري أصحاب النسب العليا لكن لازم تحط في بالك
شي مهم وهي الفوارق الفردية
لأن الله عز وجل أعطى كل واحد قدرته على
الفهم والاستيعاب لكن أنت المطلوب منك تسوي كل اللي تقدر عليه
لو نتكلم
عن الثقة بالنفس لازم يجيك طالب ويقول أنا مستحيل أجيب هالنسبه ما اقدر ...
كل واحد وله قدراته
ما نختلف أن كل واحد وله قدراته
لكن انعدام
الثقة بالنفس أهم سبب للفشل مو بس في الدراسة حتى في جميع أمور الحياة
خليك
دائما واثق من نجاحك وواثق من العمل اللي تسوي وواثق من مستواك ومن
مذاكرتك وانك سويت اللي عليك
ولا تخلي خيبة الأمل تسيطر عليك بمجرد انك
فشلت في شغله بسيطة
معلومة مهمة جدا يجلها كثير من الناس
أكثر الناس
يعتقد أن التذكار هو في العقل ويعتمد على العقل "التذكار هو تذكر اللي
ذاكرته من دروسك في وقت الامتحان"
لكن الحقيقة التذكار هو في النفس ...
تبغون
الإثبات
ادخل الاختبار وأنت حافظ الكتاب كامل لكن وأنت خائف ومتردد
ومرعوب من الاختبار وصدقني أنواع النسيان والغلطات
لكن ادخل الاختبار
حتى لو ما كنت حافظ الكتاب بشكل ممتاز جدا لكنك واثق من نفسك وواثق من اللي
ذاكرته وصدقني بتكون أحسن من الأول
طيب البعض يقول كيف أتغلب على الخوف
ادخل
القاعة وأنت مبتسم وتكلم مع زملائك وحس بارتياح تام وانك ذاكرت وسويت اللي
عليك وأديت واجبك والباقي على ربك
سادساً: طريقة المذاكرة
بما أننا
عرفنا الأساسيات اللي لازم نعتمد عليها عشان نقدر نذاكر بشكل صحيح
نبدأ
الحين نتعلم كيف نذاكر
(((((المذاكرة أول بأول)))))
دائما نسمعها من
كل اللي ينصحونا في المذاكرة سواء معلمين أو آباء أو أخوان أو زملاء
وفيه
استخفاف بهالنصيحه لدرجة التطنيش
يجيك الطالب يذاكر المادة مره أو
مرتين في الأسبوع وهي المفروض يذاكرها 4 أو 5 مرات في الأسبوع
طيب ما
تدري يا طالب إن المعلومة اللي تأخذها في المدرسة لو ما تذاكرها في نفس
اليوم أنها بتطير من راسك !!!
ولا تقول لي لا أنا اقدر أذاكرها زين ...
راح يفضل عندك مشكلة واللي هي إلتمام الدروس وبالذات إذا كانت مواد صعبه
مثل الرياضيات والفيزياء
وهاذي مواد تمارينها متتابعة ومختلفة في
قوانينها وأساليب حلها ولازم تذاكر كل وحده منهم باستقلاليه
يعني لو
تذاكر درس رياضيات ودرس كيمياء ودرس فيزياء ودرس أحياء ودرس إنجليزي
بيكون
درس واحد بس وخفيف ويمديك مو بس تذاكره .. يمديك تبدع في مذاكرته وتدخله
في مخك زين
أحسن من انه يكون عندك درسين أو أكثر في ماده وتذاكره بسرعة
ولا
تحاول تهرب من دروسك
لأنك لو هربت من درس بيلحقك ليوم ثاني بس انه
بيكون ملتم مع درس ثاني وبيكون أصعب وأصعب.
طيب فيه لطريقة مذاكره حلوه
واللي هي تقسيم الدرس
بس أول شي لو أعطيك هاذي الأرقام وأقولك أحفظها
تقدر تحفظها وإلا لا
637650503216954
صعبه وبتلخبط فيها كثير
طيب
لو اعطيكياها كذا
637
650
503
216
954
راح يكون حفظها
صعب شوي بس ما تلاحظ إنها أسهل من الطريقة الأولى
وهذا بالضبط شي أساسي
لازم تعتمد عليه
اللي هو تقسيم الدرس
إذا كان الدرس عندك عبارة عن
حفظ مثل قصائد في مادة الأدب
لازم أولا انك تحفظ بيتين وترددها حتى تثبت
في مخك وبعدها تحفظ بيتين لحالها وترددها حتى تثبت في مخك إلين تحفظ
القصيدة كأمله
تعال الحين ردد القصيدة كاملة وحاول تحفظها راح تلقى
الموضوع صار سهل جدا وأسهل من انك تحفظها كلها دفعه وحده
حتى في دروس
الفهم
كثير من دروس الرياضيات تكون مقسمه لأكثر من قسم
مثلا تلقى في
الدرس الواحد أكثر من طريقة لكتابة السؤال وأكثر من طريقة للحل
أحفظ
وحده من الطرق وخليها تمسك في مخك زين وكأن ما معك إلا هاذي الطريقة بس
وبعد
ما تحل عليها التمارين وتفهما زين خذلك نَفَس وابدأ بالطريقة الثانية
والحل الثاني
وبالشكل هذا بالتفصيل ما بين الحلين عشان ما تلخبط بينهم
ولو
جينا للكيمياء
مثلا عندك 8 عناصر كيميائية لازم تحفظ رمزها وخصائصها
واستعمالاتها
أكبر غلط انك تحفظ الثمانية كلهم سوى لأنك بتلخبط فيهم
أول
شي أحفظ عنصرين بشكل ممتاز وبعدها خذلك راحة 3 أو 4 دقائق ثم أبدا بعنصرين
ثانيه وخذلك راحة حتى تخلص.
حط في بالك شي مهم جدا أن المخ غالبا ما
يستحمل مذاكرة أكثر من ساعة
وعلميا اثبت أن استجابة المخ للمعلومات
تتوقف بعد 45 دقيقة من المذاكرة
وإذا كان ودك تختبر نفسك إذا كان مخك
يستجيب أو لا سوي الاختبار هذا
ابدأ بالمذاكرة وبتحس أنك نشيط وتستقبل
أي معلومة تقراها وبعد تقريبا 45 دقيقه إلى ساعة بيبدأ ذهنك يتشتت وما تلقط
المعلومة زين وعيونك ما تركز على الكتاب وتبدأ تسرح
في هاذي الحالة وقف
لأن أي معلومة بتقراها ما بتدخل مخك وإذا دخلت مخك بتطير بالراحة لأن
الذاكرة ممتلئة
وإذا قدرت تذاكر ساعة لازم ترتاح 30 دقيقه على الأقل
عشان يرتب المخ كل المعلومات اللي أخذها من المذاكرة
يعني ترتاح نص
الزمن اللي ذاكرته
وهذا الشيء زى اللي يرمي عليك كتب مده نص ساعة لازم
تأخذ فترة راحة عشان ترتب الكتب
المخ أنت ترمي عليه معلومات ولازم تعطيه
راح يرتبها
فيه كثير منا يحل مسالة رياضيات أو مسالة فيزياء وبعد
أسبوعين أو ثلاثة أو وقت الاختبار لما يذاكر لاختبار قصير
أو يراجعها
يحس بصعوبة
أو فيه شي ناقصة ومو قادر يحل المسألة ... ويحاول يتذكر كيف
حل المسألة المره الماضية ... كان فيه أسلوب معين أو ثغره في المسالة قدر
يدخل فيها على الحل... بس وش هالاسلوب .. نسيه !! وهاذي مشكلة
وأحسن
طريقة لتجنب هالمشكلة هي
اكتب شرح الحل في الوجه الثاني من الصفحة وكيف
حليتها خطوه خطوه وبكلامك السلس وبدون فلسفة وكلام فصيح لأن ما بيقراه إلا
أنت
وهاذي طريقة ناجحة وجربتها شخصيا
وشي مهم جدا وقت المذاكرة واللي
هو الدفتر الكشكول والقلم
لازم أي شي تحفظه أو تفهمه انك تكتبه على
ورقة سواء كان تمرين أو قانون أو تعريف أو نقاط أو مصطلح أو خصائص أو قصيدة
أو قاعدة الخ
ودائما في المسائل إذا خلصت من فهمها اقرأ السؤال واكتب
حله في ورقة خارجية
لا تقول لا فهمت ما يحتاج أعيد... لأنك بالطريقة
هاذي بتنساه حتى لو كان سهل جدا
ونصيحة
صدقوني صدقوني مهما كانت
المادة صعبه ولو كانت الهندسة النويية لو تذاكرها كل يوم بيومه وتراجعها
والله بتكون سهله
ما فيه شي صعب بالمذاكرة المستمرة