قصة هزلية رووعة ==> سعدان قتلاتو الرجلة ...

سعدان قتلاتو الرجلة ...

استيقظ الشيخ سعدان من فراشه في ذات صبيحة يحدث المرآة و هو يغسل وجهه و يتمتم بكلام ارتجالي :

ليوم ماتفراش ليوم نبينلهم واش نكون لهذو لي ما يحشموش و اقولو عليا خواف ... انا سعدان يا جدكم لكبير فيكم قد وليدي و اقطع فيا !!!!!

راني جاي اصبرو برك ما تهربوش كي نخرج للحومة ... نلبس البيري و النواظر ... اوووو فور خموس عليا تقول قاع ماشي في عمري 63 سنة ... ليوم فيها خير ان شاء الله راني حاسس بلي ليوم نهاري

خرج الشيخ سعدان للحومة و هو يكلم الناس صح شركي واش راك ... صح خويا موح كاش دومين ليوم .... العشوة يا جماعة راني مشغول بزاف ...

جاز قدام تاقة طلت عليه البطولة المحلية و هي تبتسم له و تحاول جلب الانظار اليها و لكن سعدان الرجلة دار روحو ماشفهاش ما قيمهاش خلاص و واصل السير و هو يقول :

صباح ربي وجها مطلس بالماكياج او جاية تهف عليا ...

وصل الى عند محل للحلاقة لي حاكماتو الصحافة دخل اليها سعدان الرجلة ... اووو سعدان الرجلة واش راك ؟؟ زارتنا بركة تفضل يا شيخ ريح ليوم نتهلا فيك نحي عليك البيري يا شيخ راهي حطة قديمة ديمودي ..

ما تساليش يا الصحافة خدمتك تحفف برك خفي الله يسترك راهم يستناو فيا لجماعة ... كاش جديد من عندك ؟؟

والله يا شيخ راني جبتلك قائمة اللاعبين الجدد باش اروحو معاك لجنوب افريقيا ... عندك بن يمينة والله بوطرطيق هذا لوليد او كاين شاقوري ولا ربيع مفتاح رايحين اهنيوك من مشكل الجهة اليمنى ... علابالي بلي عندك مشكل في الهجوم مع غزال الحالة ماتعجبش خلاص ... انا تاخذ رايي دير بوقرة فالهجوم وخلاص ولا واش قلت يا شيخ ؟؟؟

بففف كي لحقت لهذي الهضرة انا نخليك .... عندي زوج شعرات في راسي ريحتي معاهم ساعة يا دين الله او قاعدة تفتي علينا ... ايا هاكي 10 دج و اخطينا يا رحم باباك ....

خرج سعدان الرجلة متوجها الى السينيما الافريقية قالك بلي كاين فيلم كوميدي يحكي عن مهزلة دورة انغولا فاوقف سيارة اجرة و اذا بسائقها كان جلول الطاكسيور .... يا شيخ قولي برك وين بيها راني هنا نوصلك وين تحب ؟؟؟

جابك ربي يا جلول وصلنا للسينيما اعيشك رجليا حفاو من مشوار تصفيات المونديال ... ما اكون غير خاطرك يا شيخ بصح ندخل نشوف معاك الفيلم ...

دخل سعدان الرجلة و جلول الطاكسيور للسينيما قاعدين يتفرجو حتى بداو احسو بسخانة و الغاشي لي قدامهم يسمعو فيهم يهضرو بلي الفيلم مخدوم و تم تصويره و تركيبه و محتوى السيناريو جاي من هذوك لعباد .....

فاختلط الحابل بالنابل و بدا سعدان الرجلة يصرخ : ردونا دراهمنا و لا القيرة ... ليوم ليوم ماتفراش

فجاء العساس كوفي كوجيا و قام باشهار بطاقة حمراء في وجهه بحجة احداث البلبلة و الضجيج و ازعاج من حوله ... فرد عليه سعدان : ريح وحدك يا جيعان مشتاق خبزة راني رايح و الله مانزيد دقيقة هنا مستوى هابط ... نستاهل جبتها في روحي برك .... بلاصتي ماشي هنا بلاصتي في السينيما العالمية .....

خرج سعدان الرجلة من قاعة السينيما متوجها الى جنوب افريقيا ... وطلب من جلول اعطاءه مفاتيح السيارة

بينما سعدان الرجلة يقود على عجلة من امره حتى اوقفه عمي العزوني تاع طريق السلامة ... زير يا شيخ على الجهة اليمنى وين راك طاير حبيبي ؟؟ سمحلي يا العزوني والله راني زعفان من وحد لعباد ما جبتش خبر شحال راني نجري .....

السماح عند القاضي عندك مدة 6 اشهر باش تلحق لجنوب افريقيا واش قلقك نتا ... اعطيني وثائق السيارة و رخصة السياقة العالمية ... حاضر يا العزوني هاك ....

ياوووو واش هذا permis راه قديم بزاف راه ميت يا شيخ من 86 ما عاودتوش ؟؟؟ لالا يا العزوني راني خدمت واحد جديد على 6 شهور نخرجو ....

صح شعل المصابيح الخلفية و الامامية ..... حاضر يا العزوني

ياووو واش هذا عندك المصباح الخلفي للجهة اليمنى ما يشعلش و الجيهة اليسرى راهي تشعل و تتنطفا ... شحال عندو هذا المشكل يا سعدان ؟؟

والله يا العزوني هبلتني هذيك الجيهة كل ليوم نبريكولي بكاش مصباح خطرة عنتر او خطرة لعيفاوي ما لقيتش الحل من نهار عيا رحو سليمان اما الجيهة اليسرى مشكلة خيوط لي في دماغ بلحاج ميلداك يتخلطولو ... واش تنصحنا يا حضرات ؟؟

ننصحك تخلص غرامة مالية او تشري مصباح ايمن جديد وتريقل لاغوش .... اخرج من السيارة او حلنا الصندوق الخلفي ... حاضر يا العزوني

فتح سعدان الرجلة لامال واذا بهما يجدان المهاجم زياية مكسل فيه .... فصرخ العزوني واش هذا يا شيخ عملية اختطاف ولا واش ؟؟؟

لالا يا العزوني والله لحكاية انني نسيتو فالاحتياط ما جانيش قاع فالبال

اوك معليش يا شيخ هذي المرة نسمحلك في خاطر لعجوز لي تشتيك بزاف سينيينا اورتوغراف دير لحزام او قول للمساعد ديالك جلول احبس الهضرة فالبورطابل او ربي اسهل عليك ... بصح ادي هذي الطوموبيل عند الميكانيسيان راهي فيها شوية بريكولاج و تولي top تلحق بيها حتى للدور الثاني .....

يعطيك الصحة يا العزوني راك فرحتني و بربي رايح نفرحكم في المونديال ... بلعقل برك علينا عاونونا بالسكات كيما تقول نتا ....

في التأني السلامة و في العجلة الندامة

وصل سعدان الرجلة عند الميكانيسيان و هو يقول ... السلام عليكم يا عبقري زمانك خونا شوفنا الله يسترك هذي الطوموبيل راني رايح نهبل معاها خطرة تكون مليحة او خطرة تحبس وحدها ....

صحيت يا شيخ عاش من شافك و شبيها الحنونة ديالك اصبر نحل غطاء المحرك ... بابابابابا واش هذا يا شيخ علابالك بلي راك تمشي بـ moteur مهلوك مكولي خلاص عليه هذا راه عيا طاب جنانو ... لازم تبدلو يا شيخ راك مريسكي بحياتك ....

واش تقصد يا عمي الميكانيسيان يعني نبدل منصوري اواه غير هذي لي ماتصراش راها piece لا تعوض ... دير بريكولا مانيش عارف دبر راسك شوفنا حل مؤقت حتى تخلاص لا كوب ديموند

سمحلي يا شيخ مع كل احتراماتي ليك ماعندك حتى حل آخر الا استبداله علابالك بلي طريق جنوب افريقيا بعيدة بزاف او مانظنش رايح اشدلك هذا moteur نخاف يحبسلك في نص الطريق و اطيح اومبان ... خوذ رايي راه كاين moteur جاي من اسبانيا حاجة فور بزاف ... واش قلت ؟؟

بصح راك سور بلي يصلح نخاف ما يصلحش راك تعرف moteur صعيب باش تبدلو نتا او زهرك بالاك ما يخرجش على les pieces لوخرين او تصرى خالوطة كبيرة ...

شوف يا سعدان كل واحد يتلها بخدمتو راني عارف واش راني نهضر او واش راني نخدم او زيد عندك ليبياس لوخرين تاع ديازال راك سخنتهم مليح في لاكوب دافريك قعدلك برك تبدل هذا الموتور ونخرجلك طوموبيل تقول عروسة .... خليني ندبر راسي انا نحطلك هذاك لحسن في بلاصتو والباقي عليك اعرف كيفاش تمشي بيه فالطريق ......

آه حق ... عندك اسطوانة الفرملة فورر بزاف ماعندي مانقول عليها صناعة المانية مخلطة من الانكليزية زيدلها البرتغالية .... بصح علبة السرعة راهي عيانة شوية ماراهيش تجوز مليح السرعات راهي تخلط بين 4-4-2 و 3-5-2 ... و نظن بلي عندك بياسة مدرحة تاع طايوان هاك جبور هداف دوريجين رايح اطير بيك ...

يعطيك الصحة يا خويا الميكانيسيان هنيتنا من حكان الراس ... شحال تسقاملي قاع هذي الخدمة يا خو راني نشوف بلي شهريتي قاع او ماتكفيش ؟؟

روح برك يا شيخ رانا قاع معاك فرحنا برك هذا واش نسحقو منك كلش راه خالص من عند 35 مليون جزائري لي راهم قاع يستناو في رفع راية الجزائر في سماء جنوب افريقيا محفل الكبار فلن يقدر بثمن عودة الكرة الجزائرية الى مصاف الكبار ....

قبل ماتروح يا شيخ ماتنساش تدي الطوموبيل للروداج مع صربيا و رجعلي لخبر ....

كنتم مع يوميات "سعدان قتلاتو الرجلة"

سلام .......